Golfa eta kontserbazioa, bateragarriak? Seguru?

Hala saldu nahi izan digute administrazioek eta golfariek berek, baina errealitateak erakusten digu ez dela egia. Ez behintzat gaur egun golfaren erabiltzaileek erakusten duten portaera lotsagabea tartean dela.

Gauza jakina da golf zelaia dunaren gainean egina dela. Baina duna  eta bertako berezko landaretza ez da aproposa golfean aritzeko, eta klubak egin zuen lehen gauza ingurua eraldatzea izan zen, bertako landaretza kenduz eta belar motza hazteko moduko espezieak eta teknikak aplikatuz. Teknika horien artean, landare-espezie exotikoak ereitea, horien zainak haziarazteko hormonak botatzea, pestizidak luze eta zabal botatzea, sator eta konejuak kentzea...

Inurritza babestea erabaki zenean, golfarekin adostu zen zelaiko 'kale' eta green ez zen eremu orotan bertako landaretza errespetatuko zela, eta ez zela ez zanpatuko ez haren gainean jokatuko. Izan ere, oso landaretza galkorra da, eta lurra ere, oso materia organiko gutxikoa eta oso hondartsua baita, aise higatzen dute oinetakoek zein makilakadek.

Lehenago ere salatu izan dugu golfariek ez dutela errespetatzen errekara pasatzeko debekua eta galdutako bolen bila noiznahi pasatzen direla, landare eta hegaztien habiak galarazteko arriskuak bost axola diela, eta Aldundiek ez duela ezertxo ere egiten urratzaileak zigortzeko eta egoera aurrera begira bideratzeko.

Oraingoan errekan ez, baizik eta zelaian bertan ikus ditzakegu nahi dutena egiten eta babestutako landareak propio txikitzen. Hara:

Eta, bidenabar, umeei gaizki erakusten.

GOLFA ALA DUNA

Kitto, itsasoak eraman du Zarauzko hondartza nagusiko duna enbrionarioa eta kostaldeko duna-lerro osoa, duna mugikorrak esaten zaien zati hori, alegia.

Iñurritzako Biotopoko dunak Euskal Herriko kostaldeko duna-sistema handiena osatzen zuten eta dute. Baina, ez da ekosistema naturala. Golfaren eraginez, duna-sistema hori hein handi batean artifizialduta dago. Lehendik zuen itxurak, alegia, morfologiak, nabarmen erakusten zuen hori. Goiko pasabideak eta golfaren seguritate-hesiak erabat baldintzatu du duna horren izaera eta forma. Egitura zurrun horiek gabe, dunak ez luke mendebaldean erakusten zuen malda hain handia, askoz ere malda leunagoa luke aurre alde osoan, eta atzean forma gorabeheratsuagoa erakutsiko luke. Golfak osatzen duen lautada irmo horren eragileak Golfeko lorezainak dira, ez itsasoa eta haizea.

Itsasoak erakutsi digu, beste behin, zeinen absurdoa gerta litekeen ingurune naturalak berreskuratzea baldintza naturalak errespetatu gabe. Hiru bat hamarkada pasa ditugu aste gutxitan itsasoak eraman duen ekosistema zaintzen. Pittinka, pittinka, bertako landare-populazioak hazten eta egonkortzen ikusi ditugu, esperantza eta poz handiz. Arro esaten genuen hor genituela hainbat espezie endemiko, gure kostaldean beste inon gure kostaldean aurki ezin direnak, baina, bistakoa denez, behar ez bezala genituen. Gotortuta eta tokatzen ez zitzaien azaleran pilatuta. Argi erakutsi digu itsasoak zeinen inozoak garen, zeinen ezjakinak.

Gertatutakoa gertatu da, eta ez du bueltarik. Baina, orain da garaia Golfarekin zirt edo zart egiteko. Dunak edo golfa, ez dago biak batera mantentzerik. Iñurritzako dunak dagokion lekua eskuratu behar du, baldintza naturalek, haizeak eta itsasoak eman behar diote forma eremu horri. Horrek baino ez ditu jarriko galdu dugun duna mugikorra, eta bertako landareak, berreskuratzeko aukera.

Madrilen Costas Ministerioari eskatu diogu atzeratu dezala deslindea, desjabetu ditzala Udalaren eta Narros-eko markesaren lurrak. Udalari eskatu diogu, behingoz buka dezala auzi honekin. Ez ditzala eman seguritate-hesiak jartzeko baimenak, eta bitartean, debeka dezala Golf-jarduera Iñurritzako Biotopoan. Gipuzkoako Foru Aldundiari eskatu diogu, behingoz eta arduraz, har dezala bere gain, legeak eskatzen dion bezala, altxor natural hori kudeatzeko lema.

Berandu gabiltza, baina agian ez beranduegi. Eskuratu dezagun duna-eremu hau naturarentzat, eta bide batez, Zarauztar eta herritar guztiontzat. Orain arte ez dugu xentimorik kobratu beste batzuen gozamenerako izan denean, beraz, bada garaia buelta eskatzeko. Iñurritzako duna-sistema osoa berreskura dezagun, guztiona dena, guztiontzat izan dadin.

Lehen pausoa izango da aurten egiteko zegoen pasaleku elebatua ahalik eta barruen egitea, horretarako golf-eremuari kendu behar zaion lurra kenduz. Golfekoen beldur gabe, eskuzabal jokatu beharko lukete erakunde publikoek lur publikoaren zati handi bat herritarrentzat berreskuratzeko orduan.

Ondorengo bideoaren irudiak Ekaitzek grabatutakoak dira

Ondorengo argazkiak Lorentxo Portularrumek ateratakoak dira

Ondorengo beste argazki hauek Iñakik ateratakoak dira